red's alimuom.atbp

5
talim
Ram, Part 9.5
(mula sa series: "ang mga lalaki sa buhay ni red")

matalim ang mga mata ni ram nang magising ako kinabukasan, pero hindi ko ito pinansin.

alam kong dumating sya nung madaling araw at alam ko ding nagtabi pa sila ni ross sa pagtulog. siguro, may nangyari pa sa kanilang dalawa na hindi ko na namalayan sa sobrang puyat ko. isa pa, wala na talaga akong pakialam.

"inka manganin," pakli ko kay ross nang matapos na kaming mag-almusal ni ram. sa wikang Iluko, pagtawag iyon para kumain na may halong pamimilit.

"wen, apo," sagot naman nya na pagsang-ayon.

may mabigat na aura akong naramdaman. yung aura na parang nanonood ka ng asian horror film. paglingon ko: si ram.

saglit lang na tumingin sa akin: nanunumbat, nag-aakusa. naniningil. naiiyak sa galit. all in one. kung anime ito, isang matalim na kamekame wave ang tumagos sa aking dibdib. tuloy lang ako sa paglalatag ng aking computer habang hinarap naman ni ram ang mga labahan.

narinig kong may nagtext sa aking cellphone, pero hindi ko pinansin dahil mayroon akong mga kailangang tapusin nang araw na 'yon.

nagbabanlaw na ng labahin si ram nang magsawa ako sa pagta-type at basahin ang text.

si ram pala: "wala kang delicadeza! ahas! hindi ka talaga pwedeng pagtiwalaan. tinatraydor nyo ako nang harap-harapan! may sarili pa kayong lenggwahe sa harap ko?"

nang gabing 'yon, may isa pa akong text na natanggap nang pumasok sya sa call center: "umalis ka na dito. ayoko nang makita ang pagmumukha mo pag-uwi ko bukas."